Iloilo City Proper – Nagapabilin sa covered gym kag nagakinahanglan sang bulig ang mga pamilya nga nasunugan sang puluy-an sa Barangay Veterans Village, City Proper kahapon sang aga.
Sandig sa datos halin sa City Social Welfare and Development Office, 13 ka balay ang totally damaged kag pito ang partially damaged.
71 ka mga pamilya ang apektado nga ginalakipan sang 195 ka mga indibwal.
Sa subong, padayon pa nga gina-imbestigaran sang Bureau of Fire Protection ang natabo nga insidente.
Sa interview sang Bombo Radyo kay Punong Barangay John Eric David sang Brgy Veterans Village, Iloilo City Proper, iya ginpahayag nga nagpalab-ot naman sang bulig ang nagkalain lain nga ahensya sang gobyerno kaangay sang food packs, hygiene kag sleeping kits sa mga nasunugan.
Nagpanugyan naman si David sa mga pumuluyo nga mag-aligmat kag siguraduhon gid nga kuhaon sa mga salaksakan ang appliances nga mahimo nga makatuga sang sunog.
