ILOILO CITY – Ginpangbalasa ang tanan nga mga station commanders sa Iloilo City Police Office epektibo kahapon nga adlaw.
Si Police Major Shella Mae Sangrines sang Iloilo City Police Station 1 ang subong full-fledged Public Information Officer sang Iloilo City Police Office.
Si Police Major Jose Val Ladublan sang La Paz Police station ang deputy chief sang City Intelligence Unit.
Si Police Major Eduardo Siacon Jr. sang Jaro Police Station ang bag-o nga deputy chief sang Iloilo City Mobile Force Company.
Si Police Major Marlyn Roquero sang Molo Police Station ang officer-in-charge sang Women and Children s Protection Desk.
Si Police Major Chen Ta agras naman sang Arevalo Police Station ang deputy chief sang City Investigation and Detection Management Unit.
Ang mga bag-o naman nga officer-in-charge sang tagsa ka mga police stations amo sanday:
*Police Captain Mavin Lara o sa Iloilo City Police Station 1;
*Police Captain Johnna Aguil sa La Paz Police Station;
*Police Captain Lester Oliveros sa Jaro Police Station;
*Police Captain Benjie Dicen sa Molo Police Station;
*Police Lieutenant Colonel Albert Sy sa Mandurriao Police Station (concurrent capacity); kag
*Police Captain Resty Labasteda sa Arevalo Police Station.
Sa interview sang Bombo Radyo kay Police Colonel Joeresty Coronica, officer-in-charge sang Iloilo City Police Office, iya ginpahayag nga ang tanan nga mga station commanders ang gin-relieve bangud nga manug duha na ka tuig nga nagapungko sa serbisyo kag kinahanglan na nga sayluhon.
Dugang pa ni Coronica, ang mga officer-in-charge naman sa mga istasyon ang ipaidalom sa evaluation sa sulod sang tatlo ka bulan.
Magluwas sa mga station commanders, gin-relieve ang tanan nga mga personnel sang Iloilo City Drug Enforcement Unit magluwas lamang sa isa nga wala na-assign sa operation kundi naga-function bilang administrative staff.
Ginpang-islan man ang mga personnel sang Mandurriao Police Station.
Suno kay Coronica, gin-schedule lamang ang pagsaylo sa mga ini agud nga indi ma-apektuhan ang operasyon sang istasyon.
Ginpahayag dugang ni Coronica nga ginasigurado sang talatapan nga wala sang pulis nga may kahilabtanan sa ano man nga criminal activities bangud suno sa iya, tinutuyo man nila nga makuha ang pagsalig sang publiko.
Nagapati ini nga mangin maayo pa ang performance sang kapulisan pinaagi sa bulig sang publiko.
Nahibaluan nga mismo si Police Brigadier General Leo Francisco kag Iloilo City Mayor Jerry Tre as mismo ang nagmandu sang pagbalasa sang mga personnel sa Iloilo City Police Office.
