Nagpaandam ang Employers Confederation of the Philippines (ECoP) nga mapilitan ang micro and small enterprises nga magpasaka sa presyo ukon magbuhin sang ila trabahador kun magpasar ang Kongreso sang layi para sa P750 nga wage hike.
Suno kay ECoP President Sergio Ortiz-Luis, 90% gid sang mga enterprises sa pungsod ang makabig nga micro samtang 8% naman ang small businesses.
Kun pwersahon ini nga mga negosyo nga magpasaka sang sweldo suno kay Luis, ipasa man nila ini sa market ukon kakasan ang ila workforce.
“90% of our enterprises are micro, 8% are small, 1% are medium, and 1% are large. Any untoward increase would push the company to either pass it on to the market or downsize its workforce,” pahayag sang presidente sang grupo.
Pat-od suno kay Luis nga ang dalagku lamang nga mga negosyo ang maka-afford sang wage hike.
Nahibaluan nga gin-file sang minority bloc ang House Bill No. 7568 nga nagaduso sang wage increase nga P750 para sa tanan nga private-sector workers.
Lakip na diri ang naga-trabaho sa special economic zones, freeports, kag sa agricultural sector.
Ini nga hagna ang baliskad sa abiso sang economic managers nga una na nagpaandam nga kun iduso gid ang wage increase, maapektuhan ang competitiveness sang Pilipinas. ##
