Nagpanugyan sa publiko ang isa ka dental health expert nga indi magkahadlok nga magpadulong sa dentist kon nagabatyag na sang mga sintomas sang tooth decay.
Sa interview sang Bombo Radyo kay Dr. Rizjan Java Fantillan, isa ka dentista, iya ginpahayag nga isa sa mga ‘early signs’ sang tooth decay ang pagbatyag sang ngilo ukon nagabusog ang ngipon.
Suno kay Fantillan, mas makapaamayo kon mas temprano nga mapa-check ang ngipon agud nga matatapan kag mahatagan sang nagakaigo nga pagbulong.
Gintuad man sang natungdan nga kon ulihi na ang tanan kag wala na gid sang tsansa nga makay-o ang ngipon, mahimo ini ipaidalom sa root canal ukon gaboton na lang gid.
Kalabanan naman sang mga nagaka-eksperyensya sang tooth decay ukon dental caries amo ang naga-edad 5 ka tuig tubtob 12 ka tuig.
Nahibaluan nga santo sa data sang Philippine Dental Association, yara sa 72% sang mga Filipino ang apektado sang tooth decay.
