𝗜𝗟𝗢𝗜𝗟𝗢 𝗖𝗜𝗧𝗬 — Magapatigayon sang committee hearing ang Iloilo City Council agud imbestigaran ang mga illegal immigrants sa syudad.
Sa interview sang Bombo Radyo kay Iloilo City Vice Mayor Jeffrey Ganzon, iya ginpahayag nga posible sa masunod nga semana, adlaw sang lunes, magapatuman sila sang committee hearing agud hatagan igtalupangod ang kaso sang mga Chinese Nationals sa Iloilo City.
Suno kay Ganzon, ang hearing ang isa ka “committee of the whole” nga naka-focus sa iligal nga aktibidad sang foreign nationals sa syudad, lakip na ang human trafficking kag Philippine Offshore Gaming Operators (POGO).
Ginhatagan man sini sang importansya nga mas importante ang national security kun ikumpara sa turismo sa syudad ilabi na nga madamo sang mga foreign nationals ang nagapadulong pungsod.
Ginalantaw man sang bise-alkalde nga wala sang halo nga pulitika ang ginaduso nga hearing bangud tuyo lamang sini nga hatagan sang igtalupangod ang nasambit nga kaso.
Ginpaathag man sang natungdan nga wala ini kaagi baton sang mga offer agud mag-operate sang mga iligal nga pahampang sa syudad kaangay na lamang sang gambling.
