Ginmandu sang Japanese authorities sa ginatos ka mga residente malapit sa Tokyo nga mag-evacuate anay bangud labi nga nagalapad ang isa ka sinkhole sa intersection sa amo nga area.
Martes sang nagbukas ang parte sang road intersection sa Saitama prefecture nga naglamon gid sang isa ka truck kag driver sini.
Didto gihapon ang 74-anyos nga driver tubtub subong, buot silingon, pang-apat na ini nga adlaw nga na-trap sa sinkhole kag ginatinguhaan nga ma-rescue.
Masobra na sa 40 metros ang kalaparon sang buho nga apat ka pilo sa kalapadon sini sang una ini nga nagtuhaw.
Naggamit na ang rescuers sang cranes para nga mahakwat ang parte sang truck pagguwa sa buho, kag may ginpadala naman nga drones underground apang wala gihapon sang komunikasyon sa driver halin sang Martes.
Nagapati ang otoridad nga ang naguba nga mga tubo amo ang rason sang buho, bangud nag-leak ang wastewater, naghuyang ang duta, kag naglapad pa gid ang sinkhole.
Magluwas sa pagpabakwit sa mga residente, ginhingyo man ang 1.2 million nga mga residente nga likawan anay ang pagpaligo kag pagpanglaba para nga mabuhinan ang tubig nga amo ang nagapabudlay sa rescue mission.
Sa bahin sang Ministry of Land, Infrastructure, Transport and Tourism, nagmandu na ini sang emergency inspections sa kaangay nga sewer pipes sa Saitama kag anum ka iban pa nga prefectures kun sa diin 39 million ka mga tawo ang nagapuyo.
