Ginmando sang Office of the Basic Education Commission (Obec) ang temporaryo nga pagpasirado sang 751 ka mga eskwelahan nga nahamtang sa high-risk areas kag malapit sa border sang Thailand kag Cambodia.
Ginhimo sang ahensya ang desisyon kasunod sang nagasaka nga tensyon sa tunga sang duha ka pungsod nga nag-resulta sa paglinukpanay kun sa diin may na-record na nga casualties kag libu-libo na nga mga residente ang nagbiya sa ila mga puluy-an.
Suno kay John Mark Lopez, isa ka teacher sa probinsya sang Lopburi kag Bombo International Correspondent sa Thailand, ginsugo ang mga eskwelahan nga istrikto nga magsunod sa emergency response protocols kag i-monitor gid ang safety sang mga estudyante.
Nagpahayag man ang Education Minister sang gilayon nga pagpatuman sang psychological and welfare support para sa apektado nga mga estudyante kag ila mga pamilya.
Nagbalay man ang ahensya sang short-term kag long-term recovery measures para malikawan nga mag-untat ang mga kabataan sa pag-eskwela, makahatag sang mental health support kadungan sang displacement, kag mabalik ang educational access sa border communities.
Nahibaluan nga sa natabo nga border violence partikular na ang artillery shelling sang Cambodian forces nga nag-igo sa convenience store sa sulod sang petrol station sa Kantharalak district sang Si Sa Ket province, lakip sa napatay amo ang isa ka Grade 9 female student.
Subong nga gab-i, gin-anunsyo man nga nagpatuman na ang Thailand sang martial law sa walo ka mga distrito sa border sini sa Cambodia.#
