ILOILO CITY – Gintaningan na sang doktor ang 77 anyos nga lola nga biktima sang pagpanglampos, pagpanghimulos kag pagpangawat sa Brgy. Batiti, Concepcion, Iloilo.
Sa interview sang Bombo Radyo kay Norma Causing Lacanlali, utod sang biktima nga si Mila Causing, iya ginpahayag nga naga-isahanon lang nga nagapangabuhi ang iya utod kag ang pagbaligya sa canteen sa eskwelahan ang iya nga palangabuhian.
Suno kay Lacanlali, antes pa man nasapwan nga duguon sa saguwa sang iya balay, kasubong nga nagapalangluya ang biktima.
Ginpahayag ni Lacanlali nga sang nasapwan ang biktima, bukas na ang pwertahan kag may natimpla na nga kape nga nakita sa sulod sang balay.
Mahimo suno sa natungdan nga aga pa nga nagdul-ong sang baligya ang biktima sa eskwelahan nga yara man lang sa ila lugar.
Makahalanusbo suno kay Lacanlali ang gindangatan sang iya utod sa diin mahimo nga lunsay mga adik sa ila lugar ang mga suspek.
Nagapabilin sa Concepcion Municipal Police Station ang suspek nga si John Rey Clamares, 18, samtang ginpaguwa naman ang duha ka mga minor de edad nga suspek.
Sa subong, desidido ang pamilya nga mahatagan sang hustisya ang natabo sa biktima nga padayon nga nagabato agud nga mabuhi.
