ILOILO – Nagnubo ang numero sang eight focus crimes nga narekord sang Police Regional Office 6 sang Disyembre 16, 2024 tubtob Enero 1, 2025 kun ipaanggid sang kaangay nga period sang nagligad nga tuig.
Ang eight focus crimes ang nagatumod sa murder, homicide, physical injury, rape, theft, robbery, carnapping sang salakyan kag motorsiklo.
Sa interview sang Bombo Radyo kay PLt.Col. Arnel Solis, Spokesperson sang Police Regional Office 6, iya ginpahahayag nga nakarekord lamang ang talatapan sang 54 ka mga insidente humalin sang holiday season tubtob sa pagsug-alaw sang bag-ong tuig sa diin mas manubo ini sa 175 ka mga insidente nga narekord sang Disyembre 16, 2023 tubtob Enero 1, 2024.
Ini ang may katumbas nga 69.32 percent nga pagnubo.
Suno kay Solis, sa iban nga mga crime incidents sa amo nga period, 907 ang narekord sang PRO 6 kag mas manubo ini sa gihapon sa 1,264 nga narekord sang holiday season sang tuig 2023 tubtob 2024.
Pahayag sang natungdan, may kontribusyon ang mga pumuluyo, stakeholders, law enforcement agencies kag media sa pagnubo sang insidente sa Western Visayas bangud sa kooperasyon sang tanan sa pagpabilin nga matawhay kag malinong ang komunidad.
Samtang sa firework-related injury, nakarekord ang PRO 6 sang 80 cases sa diin mas manubo ini sa masobra 200 ka mga kaso nga narekord sang tinalikdan nga tuig.
Apang nagakasubo si Solis bangud may reported stray bullet incidents sa rehiyon nga nagapatimaan nga may yara pa sa gihapon sang mga tig-a ulo nga nagapalupok sang armas apisar sa liwat-liwat kag hugot na nga kampanya sang mga kapulisan.
