Natalana nga magpauli sa Pilipinas ang walo ka mga Pinoy sa Ukraine sa tunga sang ginakahangaw-an nga Russian invasion.
Suno kay Shirley Santosildes, pinuno sang United Filipino Global- sa Ukraine, naghatag sang libre nga airline tickets ang Philippine Embassy sa Poland para sa mga Pilipno nga tuyo magpauli sa Pilipinas.
Amat-amat naman nga naga-evacuate ang mga Pinoy sa Kyiv– ang capital sang Ukraine.
Suno kay Santosildes, ang pinaka-safe nga lugar nga mahimo padulungan sang mga Pilipino amu ang Lviv — isa ka syudad sa western Ukraine kag ginabanta 70 kilometers kalayuon sa border sang Poland.
Sa subong suno sa natungdan, nagapabilin nga malinong ang capital sang Ukraine.
Ginabanta 100 ka mga Pilipino sa Ukraine ang nakapreparar na posible matabo nga Russian invasion.
Apang, ginapanindugan naman ni Russian President Vladimir Putin nga wala ini sang plano nga i-attack ukon i-invade ang Ukraine.
Suno kay foreign intelligence chief Sergei Naryshki ginakondena sang Russia ang mga makabig “dangerous lies” nga ginpalapta sang Estados Unidos kag Western capitals.
