ILOILO CITY – Nadakpan ang walo ka mga personalidad sa magkatuhay nga drug operation sa siyudad sang Iloilo.
Lima ang naaresto sa buy bust operation sa isa ka hotel nga ginalakipan nanday James Archide, George Ian Bacuyani sang Guimaras, Larenz Onohara kag Mary Grace Galvez sang Bacolod City, kag certain Mark.
Sa interview sang Bombo Radyo Iloilo, gin-ako ni Galvez nga nagagamit ini sang iligal nga droga bangud sang iya balatian sa breast.
Mapauli na kuntani ang mga ini sa Bacolod City sang madakpan sang mga otoridad sa hotel nga ila ginatiniran.
Samtang, tatlo naman ang naaresto sa drug raid sa North Baluarte, Molo, Iloilo City.
Isa sa maga nadakpan si Alejandro Aurelio nga utod ni North Baluarte Punong Barangay Allan Aurelio.
Ginpahayag sang punong barangay sa interview sang Bombo Radyo nga siya mismo ang nagpadakop sa kaugalingon nga utod bangud madugay na nila ini nga ginahambalan.
Suno sa barangay kapitan, madugay na nga nagagamit sang iligal nga droga ang iya utod kag sadto pa ginpanugyanan nga mag-surrender sa Oplan Tokhang apang nagpakatig-a ini.
Ang duha pa nga gin-aresto amo sanday Jimboy Chavez, 30 at Darryl Didulo.