ILOILO CITY – Natigayon na nga mahawanan sang mga katapo sang Public Safety and Transportation Management Office ang 80% tubtob 85% nga obstruction sa mga dalanon sa syudad.
Sa interview sang Bombo Radyo kay Public Safety and Transportation Management Office Head Mr. Jeck Conlu, iya ginpahayag nga padayon ang ila paglibot sa mga dalanon sa syudad agud nga masiguro nga wala na sang mga ulugtasan nga mga driver ukon pumuluyo nga naga illegal park sa kilid sang mga dalanon.
Suno kay Conlu, sa tion nga ila madakpan ang mga naga illegal park, ila ini gina-isyuhan sang ticket bilang penalidad.
Ini bangud nga kun kaisa, may yara gid sang driver nga ulugtasan nga ginahingalitan ang pag park sa tion nga wala sang traffic enforcer.
Nagapasalig ang Public Safety and Transportation Management Office nga sa aga man ukon gab-i, sila ang padayon nga magalibot ilabi pa nga nagahilapit na ang pagtakop sang plaso nga ginhatag ni Presidente Rodrigo Duterte sa Setyembre 29.
Nahibaluan nga nagpanawagan ang Presidente nga hawanan ang mg dalanon sa pungsod sa sulod sang 60 ka adlaw kag kun mapaslawan, mahimo nga isuspende ang mga alkalde ukon gobernador sa tagsa ka lugar.
