PAVIA, ILOILO – Kapin isa ka milyon ka pesos nga balor sang druga ang nakuha sa isa ka durugista sa ginpatigayun nga buy bust operation sa banwa sang Pavia, Iloilo.
Ang subject sa buy bust operation ang ginkilala nga si Edwin Balinas sang Poblacion, Sta. Barbara, Iloilo kag anay driver sang bus.
Gindakop man ang nagaserbe courier nga si John Rey Napat, anay driver sang van kag tumandok sang Navas, Aklan.
Sa interview sang Bombo Radyo kay Police Major Niño Leonard Amar, hepe sang Pavia Municipal Police Station, iya ginpahayag nga madugay nga nagabaligya sang illegal drugs si Balinas.
Bisan nga stroke survivor, padayon sa gihapon ang pagbaligya ni Balinas sang illegal drugs nga naghalin pa sa Metro Manila.
Nakuha kay Balinas ang 18 ka sachet sang illegal drugs nga ginabanta nagabalor sang P700,000 tubtob P800,000 kag buy bust money nga P12,000.
Sa subong preso na sa Pavia Municipal Police Station ang duha ka durugista kag magapangatubang sang nagakaigo nga kaso.
