ILOILO CITY – I-deploy na bwas, Hunyo 1 ang 800 nga mga personnel sang Public Safety and Transportation Management Office (PSTMO) sa nagakalain-lain nga bahin sang syudad sang Iloilo kadungan sa pagpa-idalom sa Modified General Community Quarantine (MGCQ).
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga 100% ang ang ‘work force’ sang ahensya umpisa bwas nga adlaw.
Kun sadto, sa border area lang naga focus ang mga PSTMO personnel, apang subong, sa tanan na nga dalan sa syudad ang bantayan bangud istriktuhon naman ang pagpatuman sang mga road regulations.
Suno kay Conlu, ang mga traffic lights ang nakaayo naman kag bwas, pat-od nga ini ang magamit na.
Sa bahin naman sang angkas sa motorsiklo, pahayag niya, sundon lang sang ahensya ang guidelines nga ginpapanaog sang national government apang nagalaum si Conlu nga ma konsidera sang Land Transportation Office ang apelar ni Iloilo City Mayor Jerry Treñas nga pahanugutan ang angkas kun mag-pamilya man lang.
Samtang sa isyu naman sang pagdakop sang isa ka traffic aid sa tricycle driver nga nagamaneho sang barangay patrol sang Nabitasan, LaPaz kag naglabay sa Diversion Road sa Mandurriao, pahayag ni Conlu, ginpa-report na niya sa opisina ang amo nga traffic aid agud nga makapaathag kun ngaa gindakop sini ang driver sang patrol nga isa man ka tanod commander sang nasambit nga barangay.
Ang tanod commander nga si Manuel Castillanes Jr. ang padulong kuntani sa City Proper agud ma pa inject sang anti-rabbies ang iya isa ka tuig nga anak nga ginkagat sang ido.
Suno kay Conlu, sa tion nga may yara sang kapaslawan sa pag assess ang isa ka traffic aid , ini ang gina-disiplina sang nasambit nga ahensya.
Ginapahanugutan man ang paglabay sang tricycle kun may yara sang emerhensya dugang niya.
