CAMP PERALTA JAMINDAN CAPIZ-– Wala pa sang pat-od nga tion kun san-o makabalik sa area sang Western Visayas ang 82nd Infantry Batallion nga yara sa idalom ang 3rd Infantry Division sang Philippine Army.
Sa interview sang Bombo Radyo kay Captain Cenon Pancito III, spokesperson sang 3rd Infantry Division sang Philippine Army, iya ginpahayag nga mahimo indi pa sa subong makabalik ang 82nd IB bangud kinahanglanon pa ang ila bulig sa syudad sang Marawi matapos sang nagluntad nga pag-atake sang grupo sang Maute sadtong Mayo 23, 2017 sa diin nagdugay sang halos lima ka bulan ang krisis.
Nagalaum naman sila suno kay Pancito nga makabalik sa ila ang 82nd IB.
Madumduman nga ginpadala ang nasambit nga batallion sa Marawi sadtong Hulyo 17,2017 pinaagi man sa send off ceremony nga ginhiwat sa Iloilo International Airport nga gintambungan sang matag-as nga opisyales ang Army kag ang pamilya sang mga suldado.
