ILOILO CITY – Ginsaylo na sa duha ka mga hotel ang 87 ka pamilya nga nagatinir sa Bo. Obrero Gym nga apektado sang oil spill matapos naglupok sang power barge sang AC Energy sa Bo. Obrero, Lapuz, Iloilo City.
Sa interview sang Bombo Radyo kay Marian Penit, Social Welfare Officer 3 sang City Social Welfare and Development Office, iya ginpahayag nga naglab-ot sa 351 ka indibidwal ang ginsaylo sa duha ka hotel agud nga maka-angkon sang komportable nga pangginawi.
Suno kay Penit, mismo ang AC Energy ang nagdesisyon nga amat-amaton sa pagsaylo sa hotel ang mga evacuees bangud sa risgo nga mahimo idulot sang nagtagas nga langis nga padayon nga nagalapta.
Ginpahayag ni Penit nga magluwas sa akomodasyon, ang nasambit man nga kompaniya ang magagasto para sa pagkaon sang 87 ka pamilya.
Bangud nga may yara pa sang mga evacuees nga nabilin ilabi na sa mga eskwelahan nga nagaserbe nga evacuation center, ginpahayag sang natungdan nga nagapangita pa ang kompaniya sang available nga hotel room.
Nahibalu-an nga ang nasambit nga lihok ang kasunod sang pagkadismaya ni Iloilo City Mayor Jerry Treñas tuhoy sa kahimtangan sang mga apektado nga residente nga nagatinir sa evacuation centers.
