ILOILO – Siyam ka dugang nga kaso sang Coronavirus Disease 2019 (COVID-19) ang na record sang Department of Health sa Western Visayas.
Santo sa abiso sang Department of Health as of March 27, yari ang nagdugang sa kaso sang COVID-19 sa rehiyon:
-81 anyos nga lalaki sa Aklan kay may travel history sa Metro Manila
-75 anyos nga lalaki sa Bacolod City nga may travel history sa Metro Manila
-40 anyos nga lalaki sa Bacolod City nga may travel history sa Metro Manila
-68 anyos nga lalaki halin sa Aklan kag may travel history sa Metro Manila
-28 anyos nga lalaki sa Bacolod City nga anak sang labing una nga COVID-19 patient
-59 anyos nga babayi sa Iloilo nga wala sang travel history
-72 anyos nga lalaki sa Iloilo City nga may travel history sa Metro Manila apang napatay sang Marso 19
-22 anyos nga babayi sa Iloilo nga may travel history sa Metro Manila
-37 anyos nga lalaki sa Aklan kag ginahibalo pa kun may travel history sa iban nga lugar.
Nahibalu-an nga may apat na nga daan ka kaso sang COVID-19 sa rehiyon kun sa diin 1 sa Bacolod City, 1 sa Iloilo, 1 sa Iloilo City kag 1 sa Capiz.
Samtang, sa interview sang Bombo Radyo kay Mayor Macario Naulan sang Miag-ao, Iloilo, iya ginpahayag nga ang 22 anyos nga babayi nga nagposiitbo sa COVID-29 ang tumandok sang ila banwa.
Suno kay Napulan, padayon subong ang contact tracing ilabi pa nga naghalin sa Metro Manila ang pasyente nga kag nagpauli sang Marso 10.
Marso 14 suno sa alkalde sang nakabatyag ang pasyente sang sintomas sang COVID-19 apang yara na sa stable condition sa subong.
Suno naman kay Mayor Bryant Paul Biron sang Barotac Nuevo, Iloilo, ipaidalom sa Heightened Community Quarantine ang duha ka barangay sa ila banwa kasunod sang kumpirmado nga kaso sang COVID-19 sa persona sang 59 anyos nga babayi nga wala sang travel history.
Nagpamalibad naman si Biron nga ihingadlan ang duha ka mga barangay apang suno sa iya, dumili-an ang mga tawo nga magguwa sa ila balay sa sulod sang pila ka adlaw.
Ginpahayag ni Biron nga padayon ang contact tracing agud nga mahibalu-an kun sanday sin-o ang naka close contact sang pasyente.
Magapahamtang man sang isolation center para sa mga pasyente apang suno sa alkalde, indi pa niya mapalayag kun sa diin ini ipahamtang.
