ILOILO CITY – Siyam gikan sa 36 ka mga hospital sa Western Visayas ang nagpabutyag sang kahandaan nga magpadugang sang bed capacity bilang sabat sa hingyo sang Department of Health Region 6.
Ini ang may kaangtanan sa nagataas nga kaso sang COVID-19 sa Western Visayas kun sa diin amat-amat na nga nagakabuta ang mga hospital.
Sa interview sang Bombo Radyo kay Dr. Marie Jocelyn Te, COVID-19 spokesperson sang Department of Health Region 6, iya ginpahayag nga sa siyam ka mga hospital nga nagpabutyag sang kahandaan, isa diri ang nahamtang sa syudad sang Iloilo.
Suno kay Dr. Te, 7% ang increase sa bed capacity kun sa diin sa data sang Department of Health sa subong, 88 sa 177 ka COVID-19 Ward beds ang occupied, 20 sa 55 ka ICU beds ang occupied kag 378 gikan sa 621 ka Isolation beds ang occupied.
Ginpahayag ni Dr. Te nga ang nasambit nga numero ang nagakahulugan sang critical warning kag bangud sini, may yara sang contingency plan ang ahensya.
Kun sundon naman ang contingency plan suno sa natungdan, lakip sa mga dapat ikonsiderar amo ang kakulang sa space, manpower kag equipment.
