Hilway na sa katalagman ang siyam ka mga mangingisda nga sakay sang nagkapan nga sakayang pandagat sa kalalawran sa tunga sang Boracay Island kag Barangay Dawit, Caluya Island sa Antique.
Lunsay taga-Cebu ang mga mangingisda kag ginapahayag naghalin sa Coron, Palawan, kag magapauli na kuntani sa Cebu.
Sa interview sang Bombo Radyo kay Captain Erlinda Benliro, deputy commander sang Philippine Coast Guard District Western Visayas, iya ginpahayag nga mabaskog ang balod kag hangin gani nga natabo ang insidente kag naglangoy ang mga mangingisda kag nakalab-ot sa Caluya, Antique.
Antes nakaresponde ang Philippine Coast Guard, may yara na sang passing vessels nga amo ang nagbulig sa mga mangingisda nga amo
sanday:
- Ronald Magdadaro, 29
- Aster Hernandez, 42
- Andy Patalinghog, 19
- Ephraim Patalinghog, 44
- Ruel Biyong, 23
- Roque Biyong, 27
- Rogie Amit, 24
- Jupiter Amit, 31
- Juanito Torrefel, 44
Wala pa subong natumod ang fishing vessel nga ginsakyan sang mga mangingisda.
May minor injuries lang nga naangkon ang iban sa ila kag sila ang gindala na sa Baluarte Elementary School sa distrito sang Molo kag natalana nga ipaidalom pa sa debriefing antes papaulion sa Cebu.
Magapatigayon man sang fact-finding investigation ang Philippine Coast Guard Western Visayas.
