Siyam ang napatay samtang iban ang pilason matapos ang drayber sang isa ka salakyan nag-arado sa kadam-an samtang nagakinasadya sa tion sang Lapu-Lapu Day Festival sa Vancouver, Canada.
Sa interview sang Bombo Radyo kay Bombo Kenneth John Benedicto Leo, Bombo International Correspondent sa Vancouver, Canada, iya ginpahayag nga ginkakibot lang nila ang pag-arado sang isa ka salakyan sa kadam-an samtang nagatipon para sa Lapu Lapu Day Block Party, isa ka masinadyahon nga kapiestahan sa street sang mga Pilipino.
Suno kay Leo, natabo ang insidente malapit sa East 41st Avenue kag Fraser Street, nga nagresulta sa madamo nga kamatayon kag pila ka mga pilason.
Ginreport sang mga otoridad nga ang isa ka itom nga SUV nag-arado sa mga nagatambong sa festival, nga nagtuga man sang kagamo kag kakugmat sa linibo ka mga nagtambong.
Nadakpan na ang driver kag nagapabilin sa kustodiya sang kapulisan samtang nagapadayon ang imbestigasyon.
Sa subong, wala pa ginbuyagyag sang mga opisyal ang posible nga motibo sa likod sang aksidente.
Ginlaragway sang mga nakasaksi sa lugar ang ginhimo sang SUV nga isa ka “erratic” antes ini nagbunggo sa kadam-an.
Madasig naman nga nagresponde ang mga emergency services kag naghatag sang bulig medical.
Si Vancouver Mayor Ken Sim kag Canadian Prime Minister Mark Carney ang nagpalab-ot naman sang ila pagpakig-unong sa mga biktima kag sa ila pamilya, nga nagpasalig sang isa ka maid-id nga imbestigasyon.
Nahibaluan nga ang Lapu Lapu Day festival nga opisyal nga ginkilala sa British Columbia humalin sang 2023 ang nagaselebrar sang Filipino heritage kag kaisog sang indigenous leader nga si Lapu Lapu.
