Nakaabot na sa Pilipinas ang siyam ka overseas Filipino workers (OFWs) sa Lebanon nga nag-request sang repatriation bangud sa nagasingki nga gamo sa Middle East.
Ini nga mga Pinoy ang nakabaton sang P75,000 halin sa Department of Migrant Workers (DMW); P75,000 halin sa Overseas Workers Welfare Administration (OWWA); livelihood assistance balor P20,000 halin sa Department of Social Welfare and Development (DSWD); kag skills training vouchers halin sa Technical Education and Skills Development Authority (TESDA).
Bangud sa sini nga batch, nagdangat na sa 442 ka mga Pinoy ang napapauli halin sang Oktubre 2023 sang nag-gyera ang Israel batok sa Hamas nga kaalyado man sang militante nga grupo nga Hezbollah nga amo ang naka-base sa Lebanon.
Ang naglala subong nga away sa tunga sang Israel kag Hezbollah ang nagtulod sa gobyerno sang Pilipinas nga mas tunugon ang panawagan sa voluntary repatriation samtang nga may available pa nga commercial flights.
Sa latest nga statement sang DMW, ginsiling man ni Secretary Hans Leo Cacdac nga wala sang Filipino nga napilasan sa duha ka air raids sang Israeli army sa Beirut sang Oktubre 10.
Ini nga strike ang ginalaragway nga pinakamakamamatay sa tunga sang away sang Israel kag Hezbollah nga nag-resulta sa 22 ka patay kag 117 ka mga pilason.
Padayon naman ang abiso sang Philippine Embassy sa Beirut nga dapat likawan sang mga Pinoy ang apektado nga areas ilabi na ang Ras al-Nabaa kag Noueiri.
Mayorya sang 11,000 Filipinos sa Lebanon ang naga-trabaho kag nagapuyo sa capital city nga amo ang Beirut.
Nagapabilin ang Lebanon sa status nga Alert Level 3 nga buot silingon may yara sang voluntary repatariation.
