Siyam ka mga indibidwal ang napatay matapos ginpangluthang sang mga armado nga suspek sa sulod sang isa ka bar sa General Villamil Playas, Guayas Province, sa Ecuador.
Suno sa mga otoridad, hinali nga nagsulod sa establisemento ang mga armado samtang ang mga biktima nagahampang sang pool.
Wala sang klaro nga motibo ang insidente, apang ginakabig ini nga isa sa mga pinakamaduguo nga krimen sa nasambit nga lugar subong nga tuig.
Ginpahayag ni Police Colonel Jhanon Varela nga may yara pa sang duha ka biktima nga pilason kag gilayon gindala sa pinakamalapit nga hospistal para sa nagakaigo nga pagbulong.
Base sa record sang otoridad, sa una pa lang nga lima ka bulan sang 2025, naglab-ot na sa 4,051 ang kaso sang pinatyanay sa Ecuador, isa ka alarming nga indikasyon sang padayon kahangawa sang seguridad sa pungsod.
Ginausisa pa subong sang mga otoridad ang motibo sang krimen kag ang posible nga pagkilala sang mga responsable.
Nagapadayon man ang police operations sa lugar agud madakpang ang mga suspek.
