TUBUNGAN, ILOILO – 90% sang estudyante sa Tubungan Central Elementary School sa Tubungan, Iloilo ang nakakumpleto sa pagsabat kag nakapasa sang module.
Ini ang ginpahayag ni Ma. Francifel Talento-Dueñas, Principal II sang nasambit nga eskwelahan may kaangtanan sa ginapatuman nga modular learning.
Sa interview sang Bombo Radyo kay Dueñas, iya ginpahayag nga indi mahinago nga ang iban nga ginikanan ang wala sang ikasarang sa pagtudlo ukon indi gani, masako sa trabaho rason nga wala na sang tion sa pagtudlo sa ila kabataan.
Suno kay Dueñas, ang 10% nga estudyante sang Tubungan Central Elementary School ang nakapasa man sang module apang indi kumpleto ang ila sabat.
May kaangtanan diri, ginpahayag ni Dueñas nga nagapakig-angot ang school management sa barangay council para sa parent’s partner ukon volunteer nga mahimo makatudlo sa mga estudyante nga nabudlayan sa pagsabat sa module.
May kaangtanan naman sa distribution, may yara man sang ginasunod nga minimum health protocol.
