ILOILO CITY- Ginakabig sang presidente sang Pinagkaisang Samahan ng mga Tsuper at Operator Nationwide (PISTON)- Panay nga madinalag-on ang ginpatigayon nga transport strike sa syudad sang Iloilo kadungan sang nationwide transport strike agud ipabutyag ang pagpamalabag sa pag-phase out sang mga daan nga public utility jeepney pag-abot sang tuig 2020.
Sa interview sang Bombo Radyo kay Mr. Edgar Salarda, naglab-ot sa 90% sang mga depampasahero nga mga jeep ang nag-untat byahe agud mag-ugyon sa strike.
Suno kay Salarda, indi lamang sa Iloilo nag-ugyon ang mga drivers, operators kag transport groups sa nationwide transport strike.
Ginpahayag niya nga 90% man sa mga transport group ang nag-upod sa strike sa Aklan, Capiz, kag National Capital Region samtang 100% naman sa Dagupan, Pampanga, Subic, kag Negros.
Nahibaluan nga ang transport strike ang ginpatigayon sang Alliance of Concerned Transport Organizations, Pinagkaisang Samahan ng mga Tsuper at Operator Nationwide (PISTON), Stop and Go kag iban pa nga mga grupo.
