ILOILO CITY – Ginpanginwala sang pamunuan sang Bureau of Jail Management and Penology 6 tang tuhoy sa nagaguwa nga impormasyon nga nagpadulong ang ila personnel nga nagpositibo sa Coronavirus disease 2019 (COVID-19) sa Department of Ophthalmology sa Western Visayas Medical Center.
Ang nagpositibo sa COVID-19 ang isa ka Jail Officer 1, tumandok sang Hacienda Fe, Phase 1-A,Brgy. Sambag, Zarraga, Iloilo, nagaserbe bilang augmentation support sang Bureau of Jail Management and Penology 6 kag amo ang Patient no. 59.
Sa exclusive interview sang Bombo Radyo kay Jail Senior Supt. Gilbert Peremne, Assitant Regional Director for Administration sang Bureau of Jail Management and Penology 6, iya ginpahayag nga isa ka preso ang nagpa check-up sa Department of Ophthalmology sa Western Visayas Medical Center kag indi ang BJMP personnel.
Ang nasambit nga COVID-19 positive ang may close contact sa Jail Officer 2 nga nagaserbe nga escort sang preso nga nagpa check-up sa nasambit nga hospital.
Suno kay Peremne, yara sa isolation facility sa Zarraga, Iloilo ang BJMP perosnnel nga asymptomatic.
Kabug-usan naman nga 91 ka mga personnel kag trainee sang Bureau of Jail Management and Penology 6 ang gin quarantine sa regional office.
Mangin si Peremne ang nagpa quarantine man apisar nga wala siya sang close contact bilang pagsunod sa protocol.
Nahibaluan nga sang Dominggo, Abril 26, lang nagguwa ang resulta sang test sa diin nagpositibo ang nasambit nga personnel.
Sang Biyernes, Abril 24, nagpadulong pa sa Antique ang BJMP personnel kun sa diin siya pa ang nagmaneho sang salakyan nga ginkargahan sang vitamins kag personal protective equipment sa jail facility sa San Jose de Buenavista sa Antique.
Kag sang amo man nga adlaw, nagpauli sa ila balay ang BJMP personnel rason nga ginpaidalom sa lockdown ang Hacienda Fe, Phase 1-A.
