ILOILO CITY – Nagdangat na sa 91 percent sang mga barangay sa Western Visayas ang gindeklarar nga drug-cleared sang Regional Oversight Committee on Barangay Drug Clearing.
As of October 2023, tanan nga barangay sa Aklan kag Guimaras ang drug-cleared na; 99.66 percent sa Antique; 98.61 percent sa probinsya sang Iloilo; 91.6 percent sa Capiz; 73.38 percent sa Negros Occidental; 52.22 percent sa syudad sang Iloilo kag 24.59 percent naman sa syudad sang Bacolod.
Sa interview sang Bombo Radyo kay Atty. Bomrad Soc Abonado, spokesperson sang Philippine Drug Enforcement Agency Region VI, iya ginpahayag nga ginatutukan subong ang mga syudad sang Bacolod kag Iloilo bangud nga mas manubo diri ang mga drug cleared barangays.
Suno kay Abonado, mahimo nga indi maapektuhan ang status sang isa ka drug cleared barangay kun may madakpan nga durugista sa ila lugar.
Pahayag niya, kinahanglan lang nga mag-update sang Barangay Anti-Drug Abuse Council sang case monitoring kag status sang mga drug individuals sa sulod sang 30 ka adlaw.
