Nagalagas sa tyempo kag naga-doble sa pagpanikasog ang Philippine Embassy in Yangon agud nga makit-an ang apat ka missing nga mga Pilipino kasunod sang linog sa Myanmar.
Ginakahangaw-an nga na-trap ang apat sa 12 ka panalgan nga Sky Villa Condominium sa syudad sang Mandalay nga nag-collapse sang natabo ang linog sang Byernes.
Suno kay Department of Foreign Affairs (DFA) Office of Migration Affairs Director Catherine Alpay, bangkay na ang kadam-an nga nakuha halin sa Sky Villa. Kadam-an sa mga bangkay nga nakit-an sa Mandalay ang yara na sa advanced stage of decomposition kag gin-cremate na lang diretso bangud sa kakulangan sa pasilidad kag cold storage units.
Tanan nga mga lawas ang gina-check sang embahada kag nagapangita man sang paagi nga makasulod sa Mandalay Hospital agud mahibal-an kun didto ang mga Pinoy.
Samtang padayon ang recovery efforts, naka-request naman ang embahada sa local rescuers nga magkuha sang tissue samples halin sa mga napatay nga mga tawo kag i-alerto sila kun may ma-identify nga Pilipino.
Nahibaluan nga nag-abot naman didto sa Myanmar ang duha ka mga batch sang 91-member contingent sang Pilipinas nga magabulig sa paghatag sang humanitarian and disaster relief. Gin-deploy sila sang Abril 1 kag 2.
Ginabug-usan ini sang Urban Search and Rescue Teams halin sa Philippine Air Force, Philippine Army, Bureau of Fire Protection (BFP), Metropolitan Manila Development Authority (MMDA), kag Department of Environment and Natural Resources (DENR).
Yara man ang EDC and APEX Mining, Philippine Medical Assistance Team halin sa Department of Health (DOH), kag coordinators halin sa Office of Civil Defense (OCD).
As of press time suno sa military sang Myanmar, nagdangat na sa 3,000 ang patay sa bug-os nga pungsod bangud sa linog.
