STA. BARBARA, ILOILO – Ipadala sang Sta. Barbara PNP sa Camp Crame ang slug nga nakit-an sang isa ka concerned citizen kasunod sang New Year’s Eve celebration.
Sa interview sang Bombo Radyo kay Police Major Raymund Celoso, hepe sang Sta. Barbara Municipal Police Station, iya ginpahayag nga kun basehan ang slug, indi halin sa ibawbaw ang trajectory sini kag posible nga nawigit lang ukon may posibilidad man nga may yara sang nagpalupok.
Suno kay Celoso, Enero 1 sang hapon sang nakita sang concerned citizen ang nasambit nga slug sang caliber 9MM pistol malapit sa Lanag Elementary School kag daku nga pagpanghangkat ang pagtumod kun bala makabig nga stray bullet incident ang natabo bangud nga natandog na ang ebidensya.
Ginpahayag ni Celoso nga nagalab-ot sa 400-500 meters ang range sang caliber 9MM pistol apang tubtub subong, wala man sang reported shooting incident sa lugar.
Agud nga mapadali ang pagtumod sa kun sin-o ang responsable, ipadala sa Camp Crame ang slug para sa examination.
Nahibalu-an nga una na nga ginpahayag ni Iloilo Police Provincial Office Director Police Col. Roland Vilela nga gina-imbestigaran na ang tuhoy sa ginapahayag stray bullet incident sa probinsya sang Iloilo.
