ILOILO CITY – Padayon pa sa gihapon nga ginahulat ang resulta sang ballistic examanation sang bala sang 9mm pistol nga gingamit sa pagluthang-patay sa isa ka Chinese national sa dalan Iznart Iloilo City Proper.
Ang biktima amo si Willy Sy, negosyante sang Fashion accessories.
Sa interview sang Bombo Radyo kay PLt. Col. Hilarion Roga, pinuno sang Scene of the Crime Operations sa Regional Crime Laboratory, iya gipahayag nga sa Disyembre pa mahibaluan ang resulta sang imbestigasyon kun bala nagsanto ang bala nga gingamit sa pagpatay sa biktima.
Nahibaluan nga service firearm ni Police Corporal Val Allan Lisay, myembro sang Mandirigmang Mang-aawit sang Police Regional Office VI, ang ginatudlo nga gingamit sa pagpatay sa biktima.
Matandaan nga gab-i sang Nobyembre 12 sang natabo ang krimen sa diin ang suspek amo sanday Andy Mahinay alias Hapon, 38, residente sang Barangay Nonoy, Iloilo City Proper kag ang iya 16-anyos nga ihado nga si Alias Jan-jan.
Pagkasunod nga adlaw, ginsungka ni Police Corporal Lisay ang iya service firearm sa Campo Delgado.
Gilayon naman nga ginpaidalom sa restrictive custody si Lisay samtang ginahulat naman ang resulta sang cross-matching kag ballistic examination sa recovered empty fired cartridge nga ginpasa sa crime laboratory.
Kun mapamatud-an ang sala, kaso kriminal ang ipasaka bangud accomplice ukon kahimbon si Lisay sa krimen kag kaso administratibo ang ipasaka ang kaso nga malversation of public property kag grave misconduct.
Samtang, nagapasalig naman ang Police Regional Office VI nga wala sang hocus-pocus, wala sang white wash, kag wala sang biases nga matabo sa patigayunon nga imbestigasyon.
