ILOILO CITY — Naglab-ot sa masobra tunga sa milyon ka pesos nga balor sang gamit kag kwarta ang nakawat sa isa ka balay sa Brgy. Cahaguichican, Pototan, Iloilo.
Suno kay Police Senior Inspector Bonifacio Alabe, hepe sang Pototan PNP, bag-o pa man natabo ang pagpangawat, nag-abot ang mga bata kag bisita sang pamilya Velasco nga tag-iya sang balay sa nasambit nga lugar.
Bangud nga may yara sang handa nga ginpatigayon sa balay, kaagahon na sang natalupangdan sang kabulig nga naga-inukay na ang ila mga gamit.
Sang gin-usisa, wala sang may nakita nga forcible entry ukon palatandaan nga pilit nga ginsulod ang balay.
Lakip sa mga nakuha amo ang mga branded nga gamit kasubong sang Louis Vuitton nga wallet nga nagabalor sang 40 ka libo ka pesos, mga alahas nga indi magnubo sa 10 ka libo ka pesos ang isa, anum ka cellphone kag powerbank, 18 ka libo ka pesos nga kwarta kag foreign currency kasubong sang 100 Pounds kag 250 Canadian dollars.