Police ginahibalo ang kamatuoran angot sa ginapahayag bata nga ginkuhaan sang kidney kag ginhal-id nga may kwarta

ILOILO CITY — Nagahatag naman sang kakugmat sa mga pumuluyo sa nabukid nga bahin sang Miag-ao kag San Joaquin, Iloilo ang nagalagaw nga istorya nga may yara sang nagapangkidnap sang bata kag ginasulod sa puti nga Van.
Santo sa mga nagalapta nga istorya, may yara sang isa ka bata nga ginapahayag ginkidnap sang mga wala makilala nga suspetsado kag ginhal-id lamang sa dalan matapos makuhaan sang kidney sa diin ginbilinan pa ini sang daku nga kantidad sang kwarta.
Sa pagverify sang Bombo Radyo sa Miag-ao Police, ginpahayag ni Police Chief Inspector Cyril Octavio, hepe sang Miag-ao PNP, wala pa sila sang may nabaton nga impormasyon tuhoy diri.
Ginapatihan naman sang iban nga mga pumuluyo nga pagpamahog lamang ini agud magpauli timprano ang mga kabataan sa ila mga balay.