ILOILO CITY – Wala na sang plano si Iloilo City Mayor Jed Patrick Mabilog nga sabton ang mga banat ni Presidente Rodrigo Duterte.
Sabat ini sang alkalde matapos nga liwat ginhingadlan ni Duterte nga protektor sang iligal nga droga ang city mayor.
Sa speech sa atubang sang mga negosyante nga katapo sang Cebu Chamber of Commerce and Industry, ginpahayag ni Duterte nga madata ang narco-politics sa Iloilo.
Ginpabati-batian ni Duterte si Senate Minority Leader Franklin Drilon apang indi ini pamulitika suno sa presidente.
Apesar suno kay Duterte nga mag-abyan sila ni Drilon, pakaisa sang senador si Mabilog.
Sa mensahe nga ginpadala sa Bombo Radyo, ginpahayag ni Mayor Mabilog nga sa baylo patulan, iya na lamang ilakip sa iya pangamuyo ang presidente.
Ini na ang ika-duha ka beses nga ginbanatan ni Duterte si Mabilog sa iya mga speeches, bangud protektor kuno sang iligal nga droga.