ILOILO CITY – Kilalahon sang iya Alma Mater, ang ginpatay nga volunteer doctor sa Lanao del Norte nga si Dr. Dreyfuss Perlas.
Magapasar sang resolusyon ang pamunuan sang West Visayas State University (WVSU) bilang pagkilala sa maayo nga hinimuan sang alumnus sini.
Suno kay Dr. Luis Sorolla, presidente sang WVSU, ang pagpasar nila sang resolusyon, ag pagpakita sa pamilya ni Dr. Dreyfuss Perlas nga isa ini ka maayo nga doktor nga nagabulig sa pigado kag mangin modelo man para sa iban.
Pahayag ni Sorolla, kun mapasar na ang resolusyon, ila ini nga ipasa sa Commission on Higher Education (CHED) Region 6 agud papirmahan kag ibalik sa ila agud ihatag sa pamilya ni Dr. Perlas ilabi na sa ginikanan sini.
Dako nga kadulaan sa sosyudad si Perlas suno kay Dr. Sorolla.
Naka-half mast sa karon ang bandera sa WVSU agud ipakita ang ila pagpakig-unong kag pagkilala sa ginpatay nga volunteer doctor.