Autopsy report sang ginpatay nga 'doctor to the barrios' ginpa gwa na; doctor indi na mabuhi pa tungod sang patal nga pilas

ILOILO CITY — Ginpagwa na ang resulta sang autopsy examination sa lawas sang “Doctor to the Barrios” nga si Dr. Dreyfuss Perlas nga ginluthang-patay sa Lanao del Norte.
Suno kay Dr. Joe Martin Fuentes, Medico Legal Officer sang Capiz Crime Laboratory, natukiban nga nag-angkon sang igo sang bala si Dr Perlas sa likod sa diin naigo ang iya nga dughan, baga kag gusok.
Ang bala ang natumod nga iya sang .45 caliber pistol.
Gin-athag ni Dr Fuentes nga indi sa gihapon matabangan si Dr. Perlas kun gindala ini sa ospital bangud fatal ang pilas sini nga naangkon.
Matandaan nga si Dr. Perlas ang naghalin sa medical mission kag sang pauli na sa iya ginarentahan nga balay, gin-ambush sang mga armado nga lalaki nga nakasakay sa pribado nga salakyan sa Purok-4, Barangay Maranding, Kapatagan, Lanao del Norte.
Si Dr. Perlas, 31 anyos, ang tumandok sang Poblacion, Batan, Aklan, apang nagtapos sang iya kurso nga medisina sa West Visayas State University sa La Paz Iloilo City, sang tuig 2011.