ILOILO CITY — Nagpaathag ang myembro sang Majority sa House of Representatives sa ila pagpabor sa pagbalik sa Death Penalty ukon silot nga kamatayon.
Sa interview sang Bombo Radyo kay Iloilo 5th District Congressman Raul “Buboy” Tupas, ginpahayag niya nga ila nakasugtan nga ang drug-related cases na lang ang silutan bangud ini ang isa sa mga dako nga problema sang pungsod.
Gin-ako man niya nga gin-ipit sila sang Duterte administration gani nagpasugot ang mga ini nga magpabor sa pagbalik sang bitay.
Suno kay Tupas, nagakahangwa ang mga kaangay sini nga mamalidha nga mabudlayan ang mga ini nga magpangayo sang proyekto sa ti-on nga indi magsuporta sa death penalty.
Sa pihak sini, gin-athag ni Tupas nga may yara sa gihapon sang mga miyembro sang administrasyon nga may mataas nga posisyon sa Kongreso nga nagpamalabag sa pagbalik sang bitay kaangay nanday Deputy Speaker Rolando Gutierrez Andaya Jr., anay presidente kag subong Pampanga Rep. Gloria Macapagal-Arroyo, bangud sa pagpamalabag sini sa pagbalik sang death penalty.
Samtang suno naman kay Iloilo City Congressman Jerry Trenas, tion na agud ibalik ang silot nga kamatayon bangud nagalala na ang problema sa iligal nga droga.
Gin-athag man ni Treñas nga humalin sang una, pabor ini sa pagbalik sang silot nga kamatayon indi lang sa rape kundi sa tanan nga mga henious crimes.