ILOILO CITY – Masakit man sa ila balatyagon, ginbaton na lang sang pamilya sang mga missing nga crew sang naglugdang nga RO-RO vessel nga MV Starlite Atlantic ang bayad sa ila sang pamunuan sang barko.
Ini matapos nga wala sa gihapon makit-an ang 18 ka mga crew humalin sang naglugdang ang barko sang naglaslas ang bagyo Nina sa baybayon sang Tingloy, Batangas.
Sa interview ng Bombo Radyo Iloilo kay Nazir Vargas, amay sang missing crew nga si Michael Vincent Vargas sang San Nicolas, Tapaz, Capiz, ginpahayag sini nga sa 18 ka mga pamilya, 16 sa mga ini ang nagpa-settle na lang kag nagbaton sang tanyag nga P290,000 sang pamunuan sang barko.
Suno kay Vargas, magluwas sa nasambit nga kantidad, may nabaton pa gid nga separation pay ang mga regular nga empleyado sang barko, depende sa kadugayon sang ila pagtrabaho.
Samtang, duha naman sa 18 ka mga pamilya sang crew ang nagpakatig-a sa gihapon nga batunon ang tanyag nga kwarta sa diin desidido ang mga ini nga kasuhan ang Starlite Ferries Incorporated.
Nahibaluan nga masobra duha ka bulan na nga naglugdang ang barko.