ILOILO CITY – Nag-apelar ang gobyerno sa publiko nga magbulig sa paglimpyo sa hanay sang Philippine National Police (PNP).
Sa interview sang Bombo Radyo, ginpahayag ni Department of Interior and Local Government (DILG) Undersecretary Jesus “JV” Hinlo nga mabudlay ipadayon ang cleansing sa PNP kun maghipos lang ang mga pumuluyo.
Suno kay Hinlo, indi dapat magkahadlok ang publiko nga magpanugid kun may ihibalo ang mga ini sa iligal na aktibidad sang mga pulis.
Ginpahayag sang DILG official nga nakahanda ang ahensiya nga maghingyo sang bulig sa Department of Justice para hatagan sang proteksyon ang mga whistleblower batok sa mga pulis.
Ginhangkat man sang DILG ang mga pulis nga ubrahon ang ila responsibilidad sa baylo nga iduso ang personal nga interes.
Wala sang rason suno kay Hinlo nga magpangurakot ang mga pulis bangud dalagko ang suweldo sang mga pulis.