Iloilo City councilor ginbuyagyag ang ginaalegar plano nga pagpa-patay sa iya ni Rep. Trenas

ILOILO CITY – Ginbuyagyag ni Iloilo City Councilor Plaridel Nava nga may nagaplano nga ipa-patay ini.
Sa interview sang Bombo Radyo, ginpahayag ni Nava nga naggwa ang impormasyon sang nag-upod ini panyapon kay Mr. Rommel Ynion sa diin ginmuno lang sa iya sang negosyante kag anay kandidato sa pagka-alkalde sa syudad sang Iloilo, ang natabo sa tunga nila sang napatay nga drug lord nga si Melvin “Boyet” Odicta.
Suno kay Nava, nagpadulong sa balay ni Odicta si Ynion tungod man sang indi pag-intyindihanay sang duha sang tion sang eleksiyon, kag luyag klaruhon ang ginapahayag tuyo nga pagpa-patay sa negosyante.
Ginpahayag ni Nava nga samtang naga-istoryahanay ang si Ynion kag Odicta, nag-ring ang cellphone sang drug lord kag ginpakita pa sini nga si Rep. Treñas ang nagatawag sa iya.
Naggwa sa istoryahanay sang duha suno kay Nava nga ginsakyan ni Treñas ang kaakig sang mga katapo sang sindikato sang droga batok sa konsehal, kag ginpalikidar ini sang mamalidha.
Kaangot sini, ginhangkat sang konsehal ang kongresista nga ipaggwa ang iya billing statement sang postpaid plan ilabi na sa bulan sang Abril kag Mayo, 2016.
Ini agud pamatud-an suno kay Nava nga wala siya nakatawag sa drug lord nga si Melvin Odicta.
Suno kay Nava, kun sinsero ang mamalidha nga wala sang kahilabtanan sa tuyo nga pagpa-patay sa iya, ipakita ni Trenas ang pruweba nga iya ginapangayo.
Ginhingyo na ni Nava ang bulig sang National Bureau of Investigation (NBI).
Suno sa konsehal, ginatugyan na gid lamang niya sa NBI ang pag-imbestigar sa amo nga impormasyon nga nagbutang sa iya sa pagkahangawa para sa iya seguridad.