ILOILO CITY – Naghatag sang panugyan si Mayor Jed Patrick Mabilog sa publiko agud matapna ang pagtaas sang kaso sang HIV sa Region 6, partikular sa Iloilo.
Sa interview sang Bombo Radyo Iloilo, ginpahayag ni Mayor Mabilog nga kinahanglan nga ika-buhi ang pagka-Kristiyano nga mangin tampad sa partner kag agud nga indi maghimo sang malain nga buluhaton lakip na ang pagpakighilawas sa nagkalin-lain nga tawo ukon multiple partners.
Pahayag pa sang alkalde, likawan man ang paggamit sang droga bangud nangin rason man ini sa pagpakighilawas sa nagkalain-lain nga tawo tungod wala sa maayo nga paminsaron, sa diin mahimo man diri makuha ang HIV.
Una na nagpahayag sang pagkaalarma ang Department of Health (DoH) sa nagataas nga kaso sang HIV sa Iloilo City nga nagalab-ot na sa 263, pinakamataas sa Western Visayas.
Nagapangaduha ang Iloilo province nga may yara na sang 184 cases sang HIV.