ILOILO CITY – Naperwisyo ang mga pumuluyo sang Iloilo City matapos ginbaha kasunod sang halos duha ka oras nga pagbubo sang ulan.
Sa paglibot sang Bombo Radyo news team, madamo nga mga pasahero ang nastranded Iznart kag JM Basa Street.
Nagpunong man ang tubig sa Aduana-JM Basa Street kag apektado ang baligyaanay sang mga vendors sa mga public market.
Sa Iloilo Terminal Market, nagbakwit sang ila baligya ang mga vendors ilabi na ang mga bulantero sa palibot sang merkado.
Sa interview sang Bombo Radyo Iloilo kay Emma Casiple, manugbaligya sang saging kag taga-Barangay Garangan, Calinog, Iloilo, napilitan sila nga pasakaon halin sa gutter ang ila baligya tungod sang pagsaka sang lebel sang tubig.
Magluwas sa mga merkado, nahul-an man ang La Paz PNP matapos nagsulod ang tubig sa istasyon.
Sa interview sang Bombo Radyo kay Police Senior Insp. Rey Sumagaysay, hepe sang La Paz PNP, masami ini nga problema kada magbubo ang ulan tungod sang wala gihapon matapos nga kanal halin sa La Paz plaza.
Naglab-ot man sa hawak ang kataason sang tubig sa Barangay Sambag, Jaro ilabi na ang malapit sa Dungon Creek.
Suno sa isa sa mga residente nga si Josephine Minel, madasig ang pagtaas sang tubig bagud nga manabaw na ang creek, matapos nga gintambakan.