ILOILO CITY – Ginkakibot ni Mr. Winston Porras sang Iloilo City Planning and Development Office, ang pagdalahig sa iya sang negosyante kag anay mayoralty candidate nga si Rommel Ynion sa ginbuyagyag sini nga plano kuno ni Iloilo Rep. Jerry Treñas nga ipapatay si City Councilor Plaridel Nava.
Ginpahayag ni Ynion nga yara man ang presensiya ni Porras sa meeting nila sang napatay nga drug lord nga si Melvin Odicta, sang nagtawag si Treñas kay Odicta para kuno manduan ini nga patyon ang konsehal.
Eksklusibo nga ginpahayag ni Porras sa Bombo Radyo nga wala sang kamatuoran ang alegasyon ni Ynion bangud indi sila kilalahay kag wala ini sang tion sang pagsinapol sa balay ni Odicta.
Ginpanginwala man ni Porras nga nakatrabaho ini kay Treñas, kabaliskaran sa ginpahayag ni Ynion nga yara siya sa amo nga pagsinapol bangud nagatrabaho ini sa kongresista.
Pahayag pa sini, luyag kuntani ipakilala sa iya si Ynion sadto, apang nagpamalibad siya kag nagalikaw nga mag-updanay sila bangud indi sini luyag nga mamalisyahan sang iban ang iya presensya tungod nagatrabaho ini sa idalom ni Mayor Jed Ptrick Mabilog.
Gin-athag ni Porras nga wala ini sang tuyo sa pagkadto sa puluy-an ni Odicta, apang bangud may kaangtanan sa community affairs ang iya trabaho, nagakadto ini sa mga kabarangayan kag natabuan nga yara sa balay ni Melvin Odicta si Punong Barangay Nene Odicta, gani didto niya ini ginkadtuan.
Suno kay Mr. Porras, mahimo nga ang pagkadto ni Ynion sa balay sang drug lord isa ka semana antes ang eleksyon, para mangayo sang bulig sa kandidatura sini.