ILOILO CITY – Gina-imbestigaran na ang isa ka pulis nga nadakpan mismo ni Police Regional Office 6 director C/Supt. Jose Gentiles nga naka-open hammer ang armas samtang naga-duty sa guard house sang Kampo Delgado, ang headquarters sang PRO-6.
Ini ang ginkilala kay PO2 Stephen Magno nga temporaryo assigned sa Regional Police Holding and Accounting Unit (RPHAU).
Sa interview sang Bombo Radyo Iloilo, ginpahayag ni Gentiles nga iya gilayon ginkadtuan si Magno kag gin-usisa ang .45 caliber pistol nga taklos sang pulis.
Nahibaluan dugang ni Gentiles nga indi issued firearm ang armas nga may diperensya sa diin kinahanglan pa nga gamitan sang martilyo.
Ginpakumpiskar na ni Gentiles ang armas ni Magno kag ginpakustodiya sa Police Station 1 samtang ginapausisa naman kun sin-o ang nagapanag-iya sang amo nga armas.
Samtang sang gin-usisa ang record ni Magno, nahibaluan nga ini ang suspendido halin Marso 16 tubtob Abril 17 tungod sang kaso nga neglect of duty kag ginahibalo pa kun nga-a padayon ini sa pag-duty.