ILOILO CITY – Ginatuan-an na ni Iloilo City Rep. Jerry Treñas ang himuon nga tikang batok sa negosyante kag anay mayoralty candidate nga si Rommel Ynion.
Kasunod ini sang expose ni Ynion nga iya nabatian ang ginaalegar plano sang kongresista nga patyon si City Councilor Plaridel Nava.
Sa interview sang Bombo Radyo Iloilo, ginpahayag ni Trenas nga nagakonsulta na ini sa iya mga abogado para sa nagakadapat nga tikang batok sa pagguba kuno sa iya ngalan.
Samtang, ginpahayag sang mga eksperto sa laye nga lauman na ni Ynion nga mangin sentro ini sang imbestigasyon sa nasambit nga isyu.
Sa interview sang Bombo Radyo Iloilo, ginpahayag ni Atty Hector Teodosio, miyembro sang Integrated Bar of the Philippines (IBP)-Iloilo Chapter, si Ynion ang unahon nga imbestigaran kun paano ini nga nakapatigayon sang pagsinapol kaupod sang anay drug lord kag nasugid sa iya ang nasambit nga impormasyon.
Ginpahayag ni Teodosio nga dako ang mangin risgo ni Ynion sa tion nga imbestigaran sang National Bureau of Investigation (NBI) ang isyu.
Lakip sa mga una nga usisaon sang NBI suno sa abogado, amo ang koneksyon nanday Ynion kag Odicta sa diin hibaluon kun bala may negosyo ang mga ini kag kun nagahulamanay ang mga ini sang kwarta.
Magluwas diri, dako man ang posibilidad nga magapangatubang sang nagasalalampaw nga kaso si Ynion sa tion nga pasakaan ini ni Treñas bangud sa pagguba sa pangalan sang kongresista.