ILOILO CITY – Ginhangkat sang anay kandidato sa pagka-alkade sang Iloilo City kag negosyante nga si Rommel Ynion sanday Rep. Jerry Treñas, Mr. Jeffrey Celiz kag Mr. Winston Porras nga magpaidalom sa lie detector test.
Sa interview sang Bombo Radyo Iloilo, ini agud mahibaluan kun sin-o ang nagabinutig sa ila kasunod man sang expose ni Ynion nga kuno gintuyo ipapatay ni Treñas si City Councilor Plaridel Nava, sa napatay nga drug lord nga si Melvin “Boyet” Odicta.
Ginpahayag ni Ynion nga nakahanda siya nga magpaidalom sa lie detector test kag patigayunon mismo sang personnel halin sa Malacañang.
Ginpanindugan sang negosyante nga wala ini sang motibo sa pagsugid kay Kagawad Nava sang iya naaktuhan sang nagtawag kuno si Treñas kay Odicta kag natabuan nga yara sa balay sang drug lord si Ynion kay iya man nakit-an sa balay sang drug lord sanday Winston Porras kag Jeffrey Celiz.
Nahibaluan nga nagkadto si Ynion kay Odicta agud klaruhon ang impormasyon nga nabaton niya nga gintuyo man siya patyon sang anay drug lord.