ILOILO CITY – Gin-ako sang isa ka news publisher sa Iloilo nga may ideya ini sa ginaalegar plano nga pagpapatay ni Iloilo City Rep. Jerry Trenas kay City Councilor Plaridel Nava.
Sa interview sang Bombo Radyo Iloilo kay Danny Fajardo, publisher sang Panay News, isa ka lokal nga pahayagan sa Western Visayas, ginsugid man sa iya sang anay mayoralty candidate kag negosyante nga si Rommel Ynion, ang nabatian kuno sini nga tawag ni Trenas sa drug lord nga si Melvin Odicta, agud i-mando ang pagpatay sa konsehal.
Apang wala ini ginsapak ni Fajardo kag ginpili nga indi na pagpadakuon ang isyu bangud suno sa publisher, wala sang direkta nga ebidensiya nga magapamatuod sa alegasyon batok sa kongresista.
Dugang pa sang publisher, makabig nga hearsay ukon tsismis ang mga pahayag ni Ynion kag wala sang bug-at ang argumento sini.
Bilang responsable nga mamamahayag suno kay Fajardo, indi niya gusto patulan ang mga pahayag ni Ynion, apang ginpaandaman si Councilor Nava nga maghalong para sa iya seguridad.