ILOILO CITY – Pasakaan na sang kaso nga paglapas sa Republic Act 9165 ukon Comprehensive Dangerous Drugs Act ang mag-live-in partner nga nagabaligya sang iligal nga droga sa sulod sang Iloilo Provincial Integrated Jail (IPIJ) sa Barangay Nanga, Pototan, Iloilo.
Sa interview sang Bombo Radyo Iloilo kay Police Senior Inspector Bonifacio Alabe, hepe sang Pototan PNP, ginpahayag sini nga ila pa nga gina-usisa sang tul-id ang mga subject sang operasyon nga si sanday Geraldine Asis Publico, 34, kag live-in partner sini nga si Carlo Gonzalo, lunsay residente sang Brgy. Nanga, Pototan, Iloilo.
Si Publico ang cashier sa kooperatiba sa sulod sang presuhan.
Suno kay Alabe, ila natukiban nga tuig 2009 pa nagabaligya sang iligal nga droga si Gonzalo sa sulod sang IPIJ.
Ginapabaligya naman sini sa iya live-in partner nga si Publico ang droga paagi sa pagsulod sang shabu sa habon kag isulod sa karton.
Ginapaagi naman sa Palawan Pawnshop ang bayad sang mga customer nga nagabakal sang droga.
Posible suno kay Alabe nga sa IPIJ man nagahalin ang iligal nga droga kag ini ang gina-repack sa balay sang mag-live-in partner.
Ginkumpirma man ni Alabe nga ang katapo gid mismo sang mga otoridad ang nakabakal sang shabu nga nasulod sa habon.
Nakuha sa balay sang mag-live-in partner ang apat ka heat-sealed sachet nga nasulod sa habon, tatlo ka sachet sang shabu nga nasulod sa isa ka pouch, tatlo ka mga cellphones, duha ka bags nga naga-unod sang bundles sang resibo sang Palawan Pawnshop kag P6,000.
Nakit-an naman sa balay sang mga ini ang isa ka labador sang mga habon sa diin ginapatihan nga sudlan pa ini sang mga shabu.