ILOILO CITY – Hingyuon na ni Iloilo Governor Arthur Defensor Sr. sa Sangguniang Panlalawigan nga magpasar sang resolusyon agud ma-convert na sa internatioanal seaport ang Dumangas Port sa Barangay Nalooyan, Dumangas, Iloilo.
Sa interview sang Bombo Radyo, ginpahayag ni Defensor nga mas maayo kun mangin international port na ang Dumangas tungod mas madamo ang oportunidad para sa madasig nga pag-develop sang probinsya sang Iloilo.
Pananglitan madayon suno sa gobernador, indi lamang duha ka sakayan ukon barko ang mahimo maakomodar sang puerto kundi mas madamo pa.
Aminado naman ang gobernador nga dako nga pondo ang kinahanglanon sa kaangay nga proyekto.
Nagalaum ang gobernador nga may interesado gikan sa pribado nga sektor nga mangin partner para sa development sang Dumangas port.