ILOILO CITY – Sulatan sang Iloilo City Council si Presidente Rodrigo Duterte agud limpyuhan ang ngalan ni Mayor Jed Patrick Mabilog nga sulit-sulit nga gintawag sang presidente nga drug protector.
Tipunon sang City Council ang tanan nga Memorandum of Agreement (MOA), mga ordinansa, resolutions kag iban pa nga mga dokumento nga makasuporta sa ini nga tikang, agud buligan ang alkalde sang siyudad matapos liwat-liwat nga ginalawag ni Duterte sa kada halos pagtililipon nga tambungan sini.
Sa interview sang Bombo Radyo kay Kagawad Joshua Alim, iya ginpahayag nga indi nila maintyindihan sa Konseho, kun nga-a ginabalik-balik mitlang ni Presidente Duterte si Mayor Mabilog bilang drug protector.
Dugang pa ni Alim nga madamo na ang mga llihok kag ginbulig sang siyudad sa pagpamuno ni Mayor Mabilog, para sa pulis kag Philippine Drug Enforcement Agency (PDEA), kalakip na sa pagpanguna sang mga programa kag proyekto para sa mga naapektuhan sang iligal nga droga.
Daw kaangay suno sa konsehal nga indi makabuta sa panan-awan sang Presidente ang mga lihok sang siyudad.
Isa sa ginatan-aw sang mga katapo sang City Council nga pamulitika ang pagsulit-sulit ni Duterte sa pangalan sang alkalde.