ILOILO CITY – Ginpahanumdom sang mga opisyal sang Iloilo sa mga pumuluyo sa Panay nga indi pagkalimtan ang kabaganihan nga ginhimo sang mga beterano kadungan sang 62nd Liberation of Panay and Romblon subong nga adlaw.
Sa interview sang Bombo Radyo, ginpahayag ni Iloilo Governor Arthur Defensor Sr. nga dapat balikan ang hinimuan sang mga suldado nga gintaya ang ila kabuhi para makaangkon sang kalinong sa pungsod.
Suno sa gobernador, dapat kabigon nga malahalon nga butang ang anuman nga nalab-ot sang pungsod bangod sa pagpakig-away sang mga beterano kag pasalamatan ang nahimo sang mga ini para sa pungsod.
Nagpatigayon sang wreath-laying ceremony sa Veterans Cemetery sa Jaro, Iloilo CIty para sa mga napatay sa ginbansagan Battle of the Visayas.
Marso 18, 1945 sang naglunsyar sang final assault ang Panay Guerilla Forces batok sa puwersa sang Hapon nga nagsakop sa Pilipinas.