ILOILO CITY – Gintambungan sang pila ka matag-as nga opisyal sang gobyerno ang simple nga seremonya angot sa pagdumdom sang ika-72 nga anibersaryo sang Liberation of Panay, Guimaras and Romblon.
Nagpatigayon sang wreath-laying ceremony sa Veterans Cemetery sa Barangay Quintin Salas, Jaro, Iloilo City.
Ginpangunahan ini nanday Department of National Defense Undersecretary Ernesto Carolina, Iloilo Governor Arthur Defensor Sr., Iloilo City Mayor Jed Patrick Mabilog kag Brigadier General John Aying, commanding officer sang 3rd Infantry Division sang Philippine Army.
Nagtambong man ang himata sang mga beterano kag sang mga napatay sa nasambit nga inaway.
Nagpatigayon sang flag-raising ceremony samtang sa mensahe ni Department of National Defense Sec. Delfin Lorenzana nga ginbasa ni Usec. Carolina, ginpahayag sang tiglikom nga dapat dumdumon ang sakripisyo sang mga beterano kag sang mga napatay, para sa kahilwayan sang pungsod.
Tema sang commemoration sang Liberation of Panay, Guimaras and Romblon subong nga tuig ang “The Ilonggo veterans yesterday, today and the future committed to serve our country”.